danzando coa morte
todo semella de metal

(de amor e destrución masiva)

Unha proposición indiscreta,

se ti queres, pero só se ti queres

podemos sentarnos xuntas a mirar como se extingue a Terra

ollar a Lúa -xa demasiado tarde-

con vidrosa mirada cargada de culpa humana

ollar o mar bater contra as pedras da Praia das Cavernas

agora sabemos que está enfadado

intentar librarnos do noso atroz e abominábel crime

por ter chegado aquí

por deixarnos levar coa cara tapada e

polo noso propio pé

por formar parte deste sospeitoso delirio social

entón eu quixera facer

outra proposición indiscreta

se ti queres, pero só se ti queres

podemos sentarnos xuntas a mirar como exterminan a Terra

(non creo xa que estemos a tempo de vela extinguir)

ollar unha loita de xigantescos monstros atómicos que tapan a Lúa

ollar un eterno mar morto nas nosas mans

e buscar algo de amor onde sempre queda

e da man desde o principio da fin

se ti queres, pero só se ti queres

podemos levantarnos xuntas para que non nos leven a Terra